/ یوخسول‌لوق، یالقیزلیق و یاشلی‌لیغین اؤلکه‌میزده قادینسی‌لاشماسی
/ یوخسول‌لوق، یالقیزلیق و یاشلی‌لیغین اؤلکه‌میزده قادینسی‌لاشماسی

⭕️ #یازغا / #ایرا‌ن-دا یاشلی و یالقیز قادین‌لارین سایی یاشلی و یالقیز کیشی‌لردن 4 قات چوخ‌دور. ✍️ الهه امانی چئویردی: #سوسن_نواده‌رضی (اوچونجـو بؤلوم) گونوموزده #ایران‌ یاشلی‌لاری‌نین یاشام قوشول‌لاری شیددتلی‌جه سوسیال صینیف‌لارا بؤلونوب. یاشلی قادین‌لارین یوزرده اللی‌دن چوخونون هئچ بیر اقتصادی امکاناتی یوخودور و تمامن باغیم‌لی‌دیرلار. حال حاضیرداکی یاشلی‌لارین یوزده 17-سی‌نین هئچ بیر گلیری یوخ‌دور و 91%-ی عایله‌لری‌یله یاشیرلار. یاشلی‌لارا دستک سیستئمی یوخ‌دور و 70%-ینین تکمیلی سیگورتاسی یوخ‌دور. آلتینجی گلیشیم پلانیندا یاشلی‌لار اوچون اؤزل بیر سیاست معین اولماییب‌دیر.

کئچن ایلدن قرار ایدی «یاشلی‌لار اوچون استراتئژیک بلگه (سند راهبردی سالمندان)» عنوانلی بلگه حاضیرلانسین، نه یازیق کی او دا، «اوشاق‌لار و یئنی‌یئتمه‌لر اوچون دستک» عنوانلی میللی بلگه و قادینا قارشی شیددت‌ین گووه‌نلییینی ساغلاماق قانون لایحه‌سی کیمی نتیجه‌سیز قالدی.

قانونی، اقتصادی و سوسیال آیریجالیق‌لاری (تبعیضات) گونجل یاشام‌لاری‌نین هر یئینده تجروبه ائدن و اینسانی حاق‌لاری‌نین اؤزل و عمومی ساحه‌لرده شیددتین مختلیف شکیل‌لرینده ایزلمه‌سینی گؤرن قادین لار، یاشلانینجا یوک‌لری داها دا آغیرلاشیر و اونلار مدنی زیان‌لار و یاش آیریجالیق‌لاری‌نی (تبعیضاتی) دا تجروبه ائدیرل
آمارلارا گؤره ۱۳۹۵-ده ایران‌دا جینسی نیسبت ۹۷ دیر، یعنی ۱۰۰ قادینا قارشی ۹۷ کیشی. نظره آلساق کی، قادین‌لارین عؤمرو کیشی‌لردن داها چوخ اولور، ایران‌ توپلوموندا یاشلی قادین‌لارین اقتصادی باغیملی‌لیغی، توپلومدا رنگسیز چیخیشی و سیاسی حضورونون اولماماسی سبب اولور اونلار کیشی‌لره نیسبت یالقیزلیقدان داها چوخ اذیت چکسینلر. ایران یاشلی‌لاری‌نین ۲۰% قادین‌لاری و ۵% کیشی‌لری یالقیز یاشیرلار. بو آمارلار اساسیندا ایران‌دا یالقیز قادین‌لارین سایی ۴ قات یالقیز کیشی‌لردن چوخ‌دور. آتاارکیل کولتور، یاسال دستک‌لرین اولماماسی، گئریچی باخیش‌ آچی‌لاری یاشلی قادین‌لارین انزاوایا چکیلیب، دئپروسیون یاشامالارینا سبب اولور.

کیشی‌لر، حایات یولداش‌لارینی ایتیرینجه یئنی‌دن ائولنیرلر، نئچه آروادلی‌لیق دا یاسال اولاراق همیشه اونلاری الینی آچیق قویوب، آنجاق قادین‌لار چوخونلوقدا حایات یولداش‌لارینی ایتیردیکدن سونرا اوغلان‌لاری‌نین قیییوم‌لوغو آلتینا یاشیرلار کی، اونلار دا آنالاری حاقدا یئنی دن ائولنمه‌یی عموما تایید ائتمیرلر. آیری طرفدن ایسه، شهر یاشام فورماسی و یاشام اورتام‌لاری‌نین محدود اولماسینا گؤره یاشلی لارین عایله‌ده ساخلانیلماسی بیر چوخ موشکولات ایله قارشیلاشاراق اونلارین اذیت- آزارا معروض قالمالارینا سبب اولور. آیریجا ایران‌ین عمومی دورومو شهر تیکمه و امکانات باخیمیندا ایشدن دوشموش یاشلی‌لار اوچون رضایت وئریجی دوروم دییل. اقتصادی تبعیض‌لر و یوخسول‌لوق یوکونو کیشی‌لردن داها آرتیق چییین‌لرینده چکن قادین‌لار، یاشلی‌لیق موشکولاتینی دا داها آرتیق تجروبه ائدیب، یاشیرلار. سوسیال گوج‌لنمه و اویوم ایران‌داکی یاشلی‌لار اوچون طبقاتی و جینسیت برابرسیزلیک‌لرین قالدیریلماسیندان آسیلی‌دیر.

بو یازغانین قایناغی: ماهنامه خط صلح (باریش خطی آیلیق)