سولماز خانیم بالایی ایله دانیشیق
سولماز خانیم بالایی ایله دانیشیق

✍دانیشیق آپاران: #سوسن_نواده‌رضی #ایکینجی_بؤلوم 🔹نئجه اولدو موسیقی‌یه جذب اولدوز؟ 🔸 دبيریستان دؤورونده موسيقي‌یه باشلاديم. كنكور سیناولاری زامانی موسیقی كیلاس‌لاريم بير آز آخسادي اما «آواي شهريار» آدلي موسيقي گروپوندا «كُر» چالیشمالاریم وار ايدي. ائله اوردا دا حيات يولداشيم‌لا تانيش اولوب، ائولنديك. او دا خواننده اولدوغو اوچون، بيزيم ائويميزده هميشه موسيقي اولوردو. دوست‌لاريميز دا موسيقي اهلي‌ديرلر ... اما آكادميك موسيقي تحصيلينی ٥ ايل اؤنجه باكي ميللي كنسئرواتواريندا باشلاييب، كئچن ايل سونا چاتديرديم.

🔹ایلک موسیقی درس‌لرینی کیم‌دن آلدیز؟ ایلک آواز اوستادیز کیم اولدو؟
🔸ایلک موسیقی معللیمیم پیانودا جناب حقیقی اولوبلار، آوازدا ایسه خانم اصغرنیا.

🔹عادی یاشام، ایش قادینی و هنرمند اولماق چتین دئییل‌می؟!
🔸 البته کی چتین‌دیر. اما منده همیشه حیات سئوینجی و دولو- دولو یاشاماق ایسته‌یی گوجلو اولدوغونا گؤره هامی ایش‌لریمه چاتیرام.

🔹هانسی اوستادلارین شاگیردی اولموسوز؟ صنعتکار عالمیزده کیم‌دن یا کیم‌لردن ان چوخ تاثیر آلمیسیز؟
🔸 منده موسیقی هوسی عائله‌م ایله یارانیب. آتام همیشه تئیمور موصطافایئو-ین ماهنی‌لارینی اوخویاردی.
آنام، اوستاد خلیل آقا (اوستاد بیگجه خانی‌ ایله قاوال چالان اوستادلارین بیری) -دان قاوال درسی آلاردی، قارداشیم تار چالاردی ….
استاد حقیقی و اصغرنیا- دان، سونرا پیانونو جناب شیخ باقری ایله ایشله‌میشم. موغام دونیاسینا حیات یولداشیم‌لا آددیم آتمیشام.
کنسئرواتواردا ووکال‌دا «سامیر جفراوف»، “گولناز اسماعیل اوا»، «آذر زینال اوف» و موغام‌دا «منسوم ابراهیم اوف» اوستادلاریم اولوبلار.

🔹آواز صنعتی‌نین دیل ایله ایلیشکیسی واردیر می؟
🔸 البته وار. دیل و ادبیات، آوازین قانادی‌دیر دئمک اولار.

🔹اؤلکه‌میزده هنر و اؤزل‌لیکله ده موسیقی و آوازین دورومونو نئجه گؤرورسوز؟
🔸اؤلکه‌میزده چوخ مانع‌لر وار موسیقی یولوندا، اما چتین‌لیک چوخ اولدوقجا، بیر او قدر ده هوس چوخالیب.
اما حئیف کی موسیقی، زحمتی چوخ، مادی- معنوی قازانجی آز اولان بیر اینجه صنعت‌دیر.
قادین‌لارا گلدیکده ایسه، سؤز دئمک لازیم دییل! خانیم‌لارین هر ساحه‌ده بلکه بئش قات چوخ اذیت چکمه‌لرینی
هامی بیلیر.

🔹نه زامان‌دان موسیقی ائییتمن‌لییی یاپیرسیز؟ بو ساحه‌ده هانسی موشکولات یولوزو چتین‌لشدیریر؟
🔸 قیزیم دونیایا گلمه‌میشدن بیر ایکی ایل معلیم‌لیک ائتمیشم. اما ایندی تقریبا ۵ ایل‌دیر مرتب کیلاس‌لاریم اولوب.
معللیم‌لییی چوخ سئویرم، یورولسام دا لذت آپاریرام همیشه.

🔹موسیقی و آوازدا باشاریلی اولماغین شرطی یا شرط‌لری نه‌دیر؟
🔸موسیقی هم بیلیم‌دیر، هم هنر (اینجه صنعت). اونا گؤره هم ساوادین اولمالی‌دیر، هم ده چوخ چالیشمالی‌سان. چوخ دینلمه‌لی‌سن و هر زامان یئنی مئتودلاری آراشدیریب، تاپمالی‌سان. یعنی موسیقی یاشام طرزین اولمالی‌دیر.

🔹اقتصادیات هنر اؤیرنمکده نئجه تاثیر بوراخا بیلر؟
🔸 البته کی، هر ایشی اؤیرنمه‌یه واقت و پول لازیم‌دیر. بو، بیر آز دا ترجیح مسئله‌سی‌دیر. شاعیر دئمیشکن:” گر جذبه عشق اولسا گتیررم، نئجه گلمز؟!

#آردی_وار… 👇👇

@SancaqDergisi