سولماز خانیم بالایی ایله دانیشیق
 سولماز خانیم بالایی ایله دانیشیق

✍ دانیشیق آپاران: #سوسن_نواده‌رضی #اوچونجو_بؤلوم 🔹موسیقی‌ده یاخشی سس نه دئمک‌دیر؟ 🔸سس بير آللاه وئرگيسی اؤزل‌ليك‌دير. سس تمبرين ده‌ييشمك اولماز، اما ايندي سس اوستادلاري بو نتيجه‌يه يئتيشيپلركي، موسيقي دويومو اولان هر كسين سسينی ائیيتمك مومكون‌دور. 🔹توپلومون چئشیدلندیرمه (تنوع طلبی) قارشی‌سیندا توتوموز نه‌دیر؟ 🔸موسيقي‌ده سرحد يوخدور. اما من اؤزوم سئودييم و اؤيرنديیيم موسيقي‌ني ايفا ائديرم و اؤيره‌ديرم. 🔹سیزین سئودییز و اؤیره‌تدیییز موسیقی عمومیت‌ده نه‌دیر؟ 🔸كلاسيك موسيقي اوصول لارينی ، سس ائيتيمي و تحصيليم اولان "ميللي ووكال" صنعتيدیر

 

🔹اخلاقیات‌ین صنعت‌ده تاثیری واردیر می؟ صنعت اخلاقیاتی و اخلاقیات صنعتی نئجه ائتکی‌له‌یه بیلر؟
🔸اخلاق فقط موسیقی‌ده یوخ، بوتون ساحه‌لرده ایلک سؤزو دئیر. منجه تاریخ بویو دا همیشه اخلاقیاتا و اینسان‌لیغا خیدمت ائدن صنعتکارلار قالارغی اولوبلار.

🔹اوخوماق اوچون اؤزل آلت‌لره گرک وار می؟ بیر شخص، اؤز سسینی نئجه کشف ائده بیلر؟
🔸 بلی، اوخوماغا بیر ساز لازیم‌دیر. بعضی‌لرین سسی ائله گؤزل‌دیر کی، ائله هامی اونو تئز درک ائلیر. اما بعضی سس‌لر ده وار کی، بیر آز ایشله‌یندن سونرا آچیلیب، چیچک‌لنیر.
منجه بیرینده موسیقی قولاغی و ریتم دویومو اولسا سسینی آچماق اولار.

🔹ماهنی اوخوماق بیر تفنن‌دور یوخسا جیددی بیر فعالیت؟
🔸 ماهنی اوخوماق بیزیم فولکلوروموزدا وار، یعنی یاشام‌دان آیریلماز بیر حیصه‌دیر. آنا لایلالاری، زمی باشیندا اوخویان اکینچی‌لر، خالی داری‌نین دالی‌سیندا توخویوجولارین زومزومه‌لری هاممیسی اوخوماق‌دیر.
اما بیر جیددی فعالیته دؤنوشمه‌یی اوچون چوخ بؤیوک امک لازیم‌دیر.

🔹آواز اؤیرنمک ایسته‌ین‌لرین ان یایقین موشکول‌لری نه‌دیر؟
🔸آوازی چوخ آسان ظن ائدیرلر، اما کیلاسا گلندن سونرا گؤرورلرکی، چوخ چتین و مرکب بیر ایش‌دیر.

🔹موسیقی‌نین اینسان حال- روحیه‌سینده تاثیری نه‌دیر؟ فاخر موسیقی اینسان روحونو نئجه ائتکی‌له‌ییر؟
🔸موسیقی اؤیرنمک و اونا اؤنم وئرمک عائله‌لرین آراسیندا چوخالیب. اما حئیف کی، یونگول موسیقی‌لر ده بیر او قدر خالقین آراسیندا یاییلیب. یئنی نسلیمزین چوخو آغیر شعر و موسیقی دینلمه‌یه حؤصله‌لری یوخ‌دور. بیز معلیم‌لرین اؤنملی بیر ایشی ده اوشاق‌لارین ذؤوقونو اوجالتماق‌دیر.

🔹 اؤلکه‌میزده آذربایجان موسیقی‌سی ‌ نه دورومدا‌دیر؟
🔸 آذربایجان موسیقی‌سی بیزیم دامارلاریمیزدا، قانیمیزدادیر. هرکس دئسه کی، من آذربایجان موسیقی‌سینی سئومیرم یئنه ده بیر حزین سه‌گاه ائشیدنده گؤزلری دولور… نیه؟ آنا لایلاسی یادینا دوشور!… فاخر موسیقینی سئومه‌مک اولماز منجه.

🔹 فاخیر موسیقی سیزجه نه‌دیر؟ گنج‌لرین فاخر موسیقی‌دن استقبالی نئجه‌دیر؟
🔸فاخیر موسیقی‌نین کؤکو واردیر. مثلن آذربایجان موسیقی‌سی‌نین کؤکو اولان عاشیق موسیقی‌سی ائله بیر غنی موسیقی‌دیر کی، اوندا هم داستان وار، هم ایلاهیات وار، هم ساز وار، هم سؤز وار، هم رقص وار…

🔹مخاطب‌لریزدن نه اینتیظاریز وار؟ مسئول‌لاردان گؤزلنتی‌لریز وار می؟
🔸اینتیظار چوخ‌دور، خصوصا خانیم‌لارین موسیقی‌سیندن حمایت ائتمک‌لری. نئجه کی، تهران‌دا خانیم‌لارا اؤزل کونسئرت‌لر اولور، اما تبریزده اولمور.
مخاطب‌لردن ده اینتیظاریمیز بودور کی، اؤز موسیقیمیزدن کونسئرت‌لرده ایشتیراک ائتمک ایله حمایت ائله‌سینلر.

🔹چوخ ساغ اولون ده‌یرلی واختیزی مهد تمدن روزنامه‌سی‌نین «سانجاق» صفحه‌سی‌نین اختیاریندا قویدوغوز اوچون. سیزه باشا‌ری‌لار دیله‌ریک.

#سون.

@SancaqDergisi