/ #تبریز-ین وادی رحمت مزارلیغینا کورونا محدودیت‌لری گئری قایتاریلدی/ توپلانتی‌لار یاساق‌لاندی
/ #تبریز-ین وادی رحمت مزارلیغینا کورونا محدودیت‌لری گئری قایتاریلدی/ توپلانتی‌لار یاساق‌لاندی

 #خبر  تبریز بلدیه‌سی‌نین مزارلیق‌لار تشکیلاتی‌نین باش مودیری بیلدیردی: کووید 19 ویروسونون یئنی‌دن یولوخماسی و کورونادان اؤلمه‌لرین آرتماسیندان دولایی، تبریزی-ین وادی رحمت مزارلیغیندا یئنی‌دن محدودیت‌لر قویولوب، توپلانتی‌لار یاساق‌لاندی. تبریز بلدیه‌سی‌نین مزارلیق‌لار تشکیلاتی‌نین باش مودیری آرتیردی: بو اساس‌دا، ترحیم و تعزیه مراسیم‌لری‌نین کئچیریلمه‌سی یاساق‌لاندی، آیریجا اؤلولری تشییع ائدیب قویولاماق دا اؤلن‌لرین آز سایی‌دا بیرینجی درجه یاخین‌لاری‌ اوچون مومکون اولاجاق.

 

فرخ جلالی دئدی، آز سایی‌دا اقربانین دا میت نامازی، تشییع و قویولاما مراسیمینده شیرکت ائتمه‌لری‌نین شرطی، ماسک قوللانماق و سوسیال مسافه‌نین قوروماق‌ ایله مومکون اولاجاق. او دئدی: گووه‌ن‌لیک مامورلاری و پولیس‌لر ساغلیق اویاری‌لارینی سایمایاراق باشقا وطنداش‌لارین جانینی تهلوکه‌یه آتان اینسان‌لارین مزارلیق‌دا اولمالاری‌نین قاباغینی آلاجاق.

او خاطیرلاتدی: کورونادان اؤلن‌لرین تشییع و قویولاماسی، کئچمیشده اولان کیمی، اؤلونون یاخین‌لارینا یاساق‌دیر و تشییع و قویولاما سوره‌جی ساغلیق پروتوکول‌لارینا اؤزل اولاراق یئرینه گتیریله‌جک.

فرخ جلالی کورونادان اؤلن‌لرین سایی‌سی‌نین یئنه‌دن آرتماسینا گؤره اویاری وئریب، دئدی: شهر مزارلیق‌لاری ازدحام‌دان و سوسیال مسافه‌نی رعایت ائتمه‌مک‌دن دولایی کورونا یولوخماسینا مساعد بؤلگه ساییلیر بو اوزدن وطنداش‌لاردان ایسته‌نیلیر یئنی بیلدیری‌یه قدر بو یئرلرده حضورلاری اولماسین.