اوشاق‌لار دونیاسی شعر مجموعه سی / هاشم ترلان
اوشاق‌لار دونیاسی شعر مجموعه سی / هاشم ترلان

کتاب تانیتیمی * شاعر: هاشم ترلان * ناشر: سارای ، اردبیل، 1387، 60ص. هاشم ترلان 1924ده باکی شهرینده گونئیلی بیر عایله ده آنادان اولموشدور. مکتب ایل‌لریندن شعر دئمه‌یه باشلامیشدیر. صمد وورغون کیمی بؤیوک شاعرله تانیش اولوب، گؤروشور. شعرینی درگی‌ده چاپ ائدیر. 1938 ده ایرانا کؤچدورولور.آنا یوردو، سراب‌ین «مهربان» بؤلگه‌سی‌نین «زنگیلاباد کندی»نده، یئرلشیر. نئچه واخت سونرا تبریزه گلیر، یحیی شیدا ، مدینه گولگون، محمد بی ریا کیمی شاعرلرله تانیش اولور. مدنی مسئولیت‌لر عهده‌سینه آلیر...

سونرالار تهرانا کؤچور ادبی – مدنی چالیشمالارینا داوام وئریر، بیر نئچه مدت دوستاقلانیر. بیر دؤنه ده آنا یوردونا دؤنور. ۱۳۵۷ اسلامی انقلابیندان سونرا تهرانا کؤچور. ۱۳۵۸ -نجی ایلده « آلوولو شعیرلر»، شعر مجموعه‌سی چاپ اولور. اوندان سونرا چئشیدلی اثرلری چاپ اولماغا باشلانیر:
«آراز گولر»، « وطندن وطنه »، « یاخشیلیق- یامانلیق »، « اوجالانلار»، « شهسئون قیزی، سریه » ، « دورنالار گلنده »، « یولچو، یولدا گرک»، « گومو پئنجک» و نهایت اوشاقلار اوچون یایدیغی « اوشاقلار دونیاسی» آدیلا ۶۰ صفحه لیک شعر کتابی.
بو کتابین شعرلرینین اساس موضوعلاری:
• علمه تشویق: مدرسه یولومدور منیم/ معلّم/ مدرسه گونلری کیمی شعرلر . اؤرنک:
علمین دریاسیندا باتماق ایستیرم ائلیمین دردینه چاتماق ایستیرم
یوخسا قانادلاری قیریلمیش قوشام قایالار قوینوندان اوچورولموشام
• وطنه سئوگی: وطن/ آذربایجان کیمی شعرلرله . اؤرنک:
وطن وطن وطن جان وطن
من سنه قوربان وطن
آیریلمارام ائلیمدن
آدین دوشمز دیلیمدن
• طبیعت گؤرکم‌لری (گؤزل گؤرمک): گونش، اسین کولکلر، سارماشیق، آ لاله، بنؤوشه، قار یاغیر، بولودلار کیمی شعرلر. اؤرنک:
یای چاغی دیر ، گون ایستی
اسین ، اسین کولکلر
سیز گلَنده روحلانیر
سرینلَشیر اورکلر
• قیساجا ناغیل: دووشانین ناغیلی ، قاریشقا ویولچو کیمی شعرلر. اورنک:
یولچو و قاریشقا: یولچو یول ایله گئدیردی. / اؤزوندن بؤیوک/ یوک داشییان قاریشقانی گؤروب دئدی:/ – قاریشقا هرا گئدیرسن؟ / – یوواما./ – آپاردیغین نه¬دیر؟ / – آذوقه./ تاپا بیلمه¬سن؟ / دونیا بؤیوکدور. / دونیانین بؤیوکلویون هاردان بیلیرسن؟ / عاغلیمدان./ اونو هاردان بیلَک؟/ باشیمین یئکه¬لیییندن./باشینین یئکه¬لییین هاردان بیلک؟/ قارنیمین اینجه¬لیییندن./ اونو هاردان بیلک؟ / قناعتیمدن./ اونو هاردان بیلک؟ / بیر بوغدا ایله یئددی ایل دولانارام. ( اصلی ائلدن دیر.)
• اوشاق‌لارا دوغرو: اوشاق‌لارین مارشی، من بیر قیزام، آذربایجان قیزلاری، من اوغلانام، آهای اوشاقلار،دونیا اوشاقلارینا کیمی شعرلرله. اؤرنک:
آذربایجان قیزلاری
وطنین اولدوزلاری
سیزین اؤز دیلینیز وار
دیللر ایچره پاریلدار

بو کتابدان بیرشعر:

• خوروز
خوروز خوروز جان خوروز
گؤزلری مرجان خوروز
قانادلاری قیرمیزی
قویروغو الوان خوروز
گاه¬دا آغ دون گئیرسن
اولورسان مستان خوروز
باشیندا آل تاجین وار
دیللره داستان خوروز
قوق-قولی –قو دیلینده
سسینده فرمان خوروز
هارای سالیرسان هردن
آچیلمامیش دان خوروز
یاتانلاری دَبردیب
وئریرسن اذان خوروز
بعضاً واختسیز باشلاییب
وئرمیرسن آمان خوروز
باشقا خوروز گؤرَنده
باشلانیر داوان خوروز
یارالانیرسان، آخیر
ساققالیندان قان خوروز
هرنه اولسان قشنگسن
گؤزلری مرجان خوروز!