/ آمریکایا نوکلئئر سالدیری تهدیدی
/ آمریکایا نوکلئئر سالدیری تهدیدی

آساخبر: #قوزئی_کوره بیلدیردی، #آمریکا طرفیندن نوکلئئر تهدیدلرین تکجه جوابی نوکلئئر سیلاح قوللانماق‌دیر. قوزئی کوره آمریکایا قارشی نوکلئئر سیلاح قوللاناجاغینا تهدید ائدیب، بیلدیردی، دونالد ترامپ طرفیندن یاغدیریلان تهدیدلر قارشی‌لیغیندا تکجه قالان یول بو دور.

 

قوزئی کوره دؤولتی جمعه گونو بیر بیانیه‌ده بیلدیردی، پیونگ یانگ دؤولتی آمریکا طرفیندن گلن نوکلئئر تهدیدلری قالدیرماق اوچون، مذاکیره و اولوسلاراراسی قانون‌لار یولوندان بوتون تلاش‌لارینی ائتدی آنجاق بوتون بو چابالار سونوجسوز قالدی. قوزئی کوره وورغولادی، نوکلئئر تهدید قارشی‌سیندا تکجه بیر سئچه‌نک قالیب، او دا نوکلئئر سیلاح قوللانماق‌دیر.

قوزئی کوره‌نین رسمی خبرچی‌لییی بیلدیردی: دونیادا هئچ بیر اؤلکه قوزئی کوره قدر نوکلئئر سالدیری تهدیدلریندن ضرر گؤرمه‌ییب. بیزیم خالقیمیز اوچون نوکلئئر تهدید هئچ ده انتزاعی بیر آنلام دییل، گرچک و سوموت بیر تجروبه‌دیر.

اؤنجه‌لر گونئی کوره و آمریکا قوزئی کوره‌دن ایسته‌میشدیلر قاباقکی مذاکیره‌لرده کی، نوکلئئز سیلاحسیزلانماغا دایر تعهدلرینی اجرا ائتسین. بو ایکی متفق اؤلکه بیلدیردیلر کی، قوزئی کوره‌نین سیلاحسیزلانماغینا ال چاتما آماجی‌یله دیپلوماتیک یول‌لارینا داوام ائده‌جکلر.

آیریجا آمریکا هاوا قوه لری‌نین یوکسک مقام‌لی بیر ژنرالی سون زامان‌لاردا بیلدیردی، آمریکا اوردوسو سورکلی قوزئی کوره‌نین تهدیدلرینه وئریله بیله‌جک جواب‌لاری اینجه‌له‌ییر و هر زامان قوزئی کوره‌نین عسکری تهدیدلرینه قارشی سئچه‌نک‌لر آختارماق‌دادیر.